કેનાલમાં તરતું શિશુ જોઈ ગ્રામજનો દોડી આવ્યા; બહાર કાઢી 108 મારફતે સુઈગામ આરોગ્ય કેન્દ્ર પહોંચાડ્યું, પોલીસ દ્વારા તપાસ શરૂ
વાવ-થરાદ
વાવ-થરાદ જિલ્લાના સુઈગામ તાલુકામાં માનવતાને ઝંઝોળી નાખતી ઘટના સામે આવી છે. સોનેથ ગામ નજીકથી પસાર થતી કચ્છ બ્રાન્ચ નર્મદા કેનાલમાંથી મૃત હાલતમાં નવજાત શિશુ મળી આવ્યું હતું. આ ઘટનાની જાણ થતાં જ સમગ્ર પંથકમાં ચકચાર મચી ગઈ હતી.
પ્રાથમિક માહિતી મુજબ, સોનેથ ગામ નજીક કેનાલ પાસેથી પસાર થતા કેટલાક લોકોએ પાણીમાં નવજાત શિશુ તરતું જોયું હતું. આ અંગે જાણ થતાં ગ્રામજનો તાત્કાલિક ઘટનાસ્થળે દોડી આવ્યા હતા. ત્યારબાદ ગ્રામજનોએ સતર્કતા દાખવી શિશુને કેનાલમાંથી બહાર કાઢ્યું હતું.
ઘટનાની જાણ 112 ઇમરજન્સી સેવા અને પોલીસને કરવામાં આવી હતી. આ ઉપરાંત 108 એમ્બ્યુલન્સને પણ બોલાવવામાં આવી હતી. એમ્બ્યુલન્સ મારફતે શિશુને સુઈગામ આરોગ્ય કેન્દ્ર ખાતે ખસેડવામાં આવ્યું હતું. જોકે, શિશુ મૃત હાલતમાં હોવાનું જાણવા મળ્યું હતું.
નવજાત શિશુને કેનાલમાં કોણે ફેંક્યું? તપાસનો વિષય
આ ઘટનાને પગલે અનેક સવાલો ઊભા થયા છે. નવજાત શિશુને કોણે અને કયા સંજોગોમાં કેનાલમાં નાખ્યું તે હજુ સ્પષ્ટ થયું નથી. બાળક જન્મ બાદ કેનાલમાં ફેંકવામાં આવ્યું હતું કે અન્ય કોઈ કારણ હતું તે પણ તપાસનો વિષય છે.
દરમિયાન, સુઈગામના ઇન્ચાર્જ પી.આઈ. સી.પી. ચૌધરીની દેખરેખ હેઠળ પોલીસે તપાસ શરૂ કરી છે. નવજાત શિશુની ઓળખ અને તેની માતા અંગે માહિતી મેળવવા તપાસ હાથ ધરવામાં આવી રહી છે.
જવાબદાર વ્યક્તિઓ સામે કાર્યવાહીની માગ
જન્મના થોડા જ સમયમાં નવજાત શિશુ મૃત હાલતમાં મળી આવતાં સ્થાનિક લોકોમાં અરેરાટી ફેલાઈ છે. આ ઘટનાને પગલે લોકોમાં રોષની લાગણી પણ જોવા મળી રહી છે.
બીજી તરફ, સમગ્ર મામલે નિષ્પક્ષ તપાસ કરવાની માગ ઊઠી છે. નવજાત શિશુ સાથે બનેલી ઘટનાનું સાચું કારણ બહાર આવે અને જવાબદાર વ્યક્તિઓની ઓળખ થાય તેવી લોકમાગ છે.
હાલ પોલીસ તપાસ બાદ જ આ ઘટનાની હકીકત અને સંજોગો સ્પષ્ટ થશે.
