12 નવેમ્બરથી નવા ભાવ અમલી; અડધા લિટરના ગોલ્ડ પાઉચમાં રૂ. 2 અને તાજામાં રૂ. 1નો વધારો
દિવાળી બાદ અમૂલે દૂધના ભાવમાં વધારો કર્યો છે. ગુજરાત કો-ઓપરેટિવ મિલ્ક માર્કેટિંગ ફેડરેશન (GCMMF) દ્વારા અમૂલ ગોલ્ડ અને અમૂલ તાજાના નવા ભાવ જાહેર કરાયા છે. આ નવા ભાવ 12 નવેમ્બરથી અમલી બનશે.
નવા ભાવ મુજબ અમૂલ ગોલ્ડના અડધા લિટરના પાઉચની કિંમત રૂ. 35થી વધારીને રૂ. 37 કરાઈ છે. જ્યારે અમૂલ તાજાના અડધા લિટરના પાઉચનો ભાવ રૂ. 29થી વધારીને રૂ. 30 કરાયો છે.
ગોલ્ડના ભાવમાં લિટરે રૂ. 4નો વધારો
અમૂલ ગોલ્ડના અડધા લિટરના પાઉચમાં રૂ. 2નો વધારો થયો છે. એટલે કે પ્રતિ લિટર રૂ. 4નો વધારો થયો છે.બીજી તરફ, અમૂલ તાજાના અડધા લિટરના પાઉચમાં રૂ. 1નો વધારો કરાયો છે. આ પ્રમાણે પ્રતિ લિટર રૂ. 2નો વધારો થયો છે. જોકે, ગોલ્ડ અને તાજા સિવાયની અમૂલની અન્ય પ્રોડક્ટના ભાવમાં ફેરફાર કરાયો નથી.
છ મહિનામાં બીજી વખત ભાવ વધારો
GCMMF દ્વારા છ મહિનાના ગાળામાં ફરી દૂધના ભાવ વધારાયા છે. કંપનીના જણાવ્યા મુજબ દૂધના ઉત્પાદન અને પ્રોસેસિંગનો ખર્ચ વધ્યો છે. તેથી ભાવમાં વધારો કરવાનો નિર્ણય લેવાયો છે.
કંપનીએ જણાવ્યું છે કે લીલા અને સૂકા ચારાના ભાવમાં વધારો થયો છે. આ ઉપરાંત પશુઆહારમાં વપરાતા ખોળ, મકાઈ અને ગોળની રસી એટલે કે શીરાના ભાવ પણ વધ્યા છે.
પેકેજિંગ અને બળતણનો ખર્ચ પણ વધ્યો
દૂધના પેકેજિંગમાં વપરાતી ફિલ્મના ભાવમાં પણ વધારો થયો છે. સાથે જ બળતણનો ખર્ચ પણ વધ્યો છે.
GCMMFના જણાવ્યા મુજબ ગુજરાત સહિત દેશના અનેક વિસ્તારોમાં ઓછો અને અનિયમિત વરસાદ પડ્યો છે. તેના કારણે પશુપાલન ક્ષેત્રે મુશ્કેલીઓ વધી છે.
કંપનીએ જણાવ્યું છે કે દૂધ ઉત્પાદકોને યોગ્ય ભાવ મળી રહે તે જરૂરી છે. તેથી વધતા ખર્ચ વચ્ચે પશુપાલકોને આર્થિક સહારો આપવા દૂધના ભાવ વધારવાનો નિર્ણય લેવાયો છે.
સામાન્ય પરિવારોના બજેટ પર અસર
દૂધના ભાવમાં થયેલા વધારાની અસર સામાન્ય પરિવારોના માસિક બજેટ પર પડી શકે છે. ખાસ કરીને રોજ દૂધ ખરીદતા પરિવારોને હવે વધુ ખર્ચ કરવો પડશે. 12 નવેમ્બરથી ગ્રાહકોને ગોલ્ડ અને તાજા માટે નવા ભાવ ચૂકવવા પડશે.
