ડીસા રિસાલા બજાર માં આગ નો બનાવ સામે આવ્યો

આ ઉનાળામાં બનાસકાંઠા જીલ્લામાં અલગ અલગ જગ્યા પર આગ લાગવાના બનાવો સામે આવી રહ્યા છે.. ત્યારે શુક્રવારે મોડી રાત્રે ડીસા શહેરના રિસાલા બજારના એક શોપિંગ કોમ્પ્લેક્ષના ધાબા પર આગ લાગવાનો બનાવ સામે આવ્યો હતો.. આ કોમ્પ્લેક્ષના ધાબા પર પડેલા પ્રતિબંધિત પ્લાસ્ટિકના કચરાનો ઢગલામાં અચાનક આગ લાગતાં અફરા તફરી મચી ગઈ હતી.. અને આસપાસના વિસ્તારના લોકો પણ ભયભીત બની ગયા હતા.. આ આગની ઘટના બનતા દૂર દૂર સુધી તેની લપટો દ્રશ્યમાન થતી હતી.. આ ઘટના બનતા એકઠા થયેલા લોકોએ તાત્કાલિક ડીસા નગરપાલિકાના ફાયર ફાઇટરને જાણ કરતાં ડીસા નગરપાલિકાનું ફાયર ફાઇટર ઘટનાસ્થળ પર દોડી આવ્યું હતું અને આગ પર કાબૂ મેળવવા માટે પાણીનો મારો ચલાવ્યો હતો.. અને લગભગ અડધો કલાક બાદ આગ પર કાબૂ મેળવવામાં સફળતા મળી હતી.. આ ઘટનામાં ડીસા નગરપાલિકાનું ફાયર ફાઇટર સમયસર ઘટનાસ્થળ પર ના પહોંચ્યું હોત તો મોટી હોનારત સર્જાવાની આશંકા હતી.. કારણ કે જે કોમ્પ્લેક્ષના ધાબા પર આગ લાગી હતી તેની નીચે જ તેલના ગોડાઉન આવેલા હતા અને જો આગ વધી હોત તો આ ગોડાઉનને પણ મોટું નુકશાન થવાની શક્યતા હતી.. પરંતુ ગનીમતે આ દુર્ઘટનામાં કોઈ જાનહાનિ કે માલમત્તાને નુકશાન પહોંચ્યું નથી…