અમદાવાદઃ કોરોનાને કારણે લાગુ કરેલા લોકડાઉન બાદ હવે ધીરે ધીરે અનલોક તરફ સરકાર આગળ વધી રહી છે. આજે ગુજરાત સરકારે અનલોક 4ની ગાઈડલાઈન જાહેર કરી છે. જે મુજબ હવેથી રાજ્યના તમામ શહેરોમાં 24 કલાક દુકાનો ખુલ્લી રાખી શકાશે આ ઉપરાંત હોટલ અને રેસ્ટોરન્ટ ગાઈડલાઈનના પાલન સાથે રાત્રે 11 વાગ્યા સુધી ખુલ્લા રાખી શકાશે.
સમગ્ર દેશમાં કોરોના વાયરસને નિયંત્રિત કરવા માટે 24 માર્ચ 2020ના રોજ 21 દિવસનું લોકડાઉન જાહેર કરવામાં આવ્યું હતું. ત્યાર બાદ તબક્કાવાર તેમાં વધારો કરવામાં આવ્યો હતો. જોકે દેશની આર્થિક સ્થિતિને ધ્યાનમાં રાખીને સરકારે નિયમોને આધિન ધીરે ધીરે લોકાડાઉનમાં રાહત આપતા અનલોક જાહેર કરી રહી છે. ત્યારે ગુજરાત સરકાર દ્વારા આજ રોજ અનલોક-4ની જાહેરાત કરવામાં આવી છે. જે અંતર્ગત રાજ્યના નાગરિકોને કેટલીક મહત્વની રાહતો આપી છે.
ગુજરાત અનલોક 4 માં કઈ કઈ છૂટછાટ આપવામાં આવી…
- દુકાનો- 24 કલાક ખુલ્લી રાખી શકાશે
- હોટલ અને રેસ્ટોરન્ટ- SOPના પાલન સાથે રાત્રે 11 વાગ્યા સુધી
- શોપિંગ મોલ- SOP સાથે ખુલ્લા રાખી શકાશે
- ફેરિયાઓ- SOPના પાલન સાથે તેઓ વેચાણ કરી શકેશે
- લાયબ્રેરી- 60 ટકા કેપિસિટી સાથે શરૂ કરી શકાશે
- GSRTC બસ- રાજ્યના તમામ જિલ્લાઓમાં ચાલશે
- સીટી બસ- અમદાવાદ અને સુરતમાં 50 ટકા મુસાફરો સાથે ચલાવી શકાશે
- પ્રાઈવેટ બસ- 50 ટકા કેપિસિટી સાથે ખાનગી બસ પણ ચાલુ રહેશે
- ઓટો રિક્ષા- એક ડ્રાઈવર સાથે બે મુસાફર
- કેબ,ટેક્ષી- એક ડ્રાઈવર સાથે બે મુસાફર (સીટીંગ કેપેસિટી 6 કરતા વધારે હોય તો ત્રણ મુસાફર)
- ટુ-વ્હીલ વાહન- બે મુસાફરો
- પ્રાઈવેટ ઓફિસ- સોશિયલ ડિસ્ટન્સિંગ સાથે ઓફિસ ચાલુ રાખી શકાશે
- પાર્ક અને જાહેર ગાર્ડન- તમામ ખુલ્લા રાખી શકાશે
- ઓપન એર થિયેટર- 21-9 થી ખુલ્લા રાખી શકાશે (મૂવી થિયેટર, સ્વિમિંગપૂલ બંધ રહેશે)
જાહેર કાર્યક્રમોમાં 100 વ્યક્તિઓને મંજૂરી
સામાજિક, શૈક્ષણિક, રમતગમત, મનોરંજન, સાંસ્કૃતિક પ્રવૃતિઓ, ધાર્મિક, રાજકિય સમારોહમાં 100 વ્યક્તિઓની મર્યાદમાં એકઠા થવાની છૂટ આપવામાં આવી છે. પરંતુ તેમણે ફેસ કવર, સોશિયલ ડિસ્ટન્સિંગ, થર્મલ સ્કિનિંગ અને સેનેટાઈજરની સુવિધા સાથે પરમિશન આપવામાં આવશે. જ્યારે લગ્ન સમારોહમાં 50 વ્યક્તિ અંતિમક્રિયામાં 20 વ્યક્તિઓને એકઠા થવાની મર્યાદા યથાવત રાખવામાં આવી છે.