ભગવાન શ્રીરામને 56 ભોગનો અન્નકૂટ ધરાવી મહાઆરતી કરાઈ; તમામ સમાજના આગેવાનો અને નગરજનોએ એકબીજાને નવા વર્ષની શુભેચ્છા પાઠવી
(વાવ-થરાદ) : ધ્રુપલ જયસ્વાલ
થરાદના નવા રામજી મંદિરે નૂતન વર્ષ નિમિત્તે સ્નેહમિલન કાર્યક્રમ યોજાયો હતો. શ્રીરામ સેવા સમિતિ દ્વારા આ કાર્યક્રમનું આયોજન કરાયું હતું. તેમાં નગરજનો, સામાજિક આગેવાનો અને વિવિધ સમાજના લોકો મોટી સંખ્યામાં જોડાયા હતા.
ભગવાન શ્રીરામને 56 ભોગનો અન્નકૂટ ધરાવાયો
કાર્યક્રમ દરમિયાન ભગવાન શ્રીરામને 56 ભોગનો અન્નકૂટ ધરાવવામાં આવ્યો હતો. ત્યારબાદ મહાઆરતી યોજાઈ હતી. મહાઆરતીમાં મોટી સંખ્યામાં શ્રદ્ધાળુઓ જોડાયા હતા.આ પછી તમામ સમાજના લોકો સ્નેહમિલનમાં એકઠા થયા હતા. સૌએ એકબીજાને નવા વર્ષની શુભેચ્છાઓ પાઠવી હતી.
હિન્દુ-મુસ્લિમ આગેવાનો એક મંચ પર જોડાયા
આ પ્રસંગે રાજપૂત સમાજના અગ્રણી ડી.ડી. રાજપૂત, પથુસિંહ રાજપૂત, જગદીશસિંહ પરમાર, કાશીરામ પુરોહિત અને સંજયસિંહ રાજપૂત ઉપસ્થિત રહ્યા હતા.આ ઉપરાંત મુસ્લિમ સમાજના અગ્રણી હાજીભાઈ પઠાણ સહિત વિવિધ સમાજના આગેવાનો પણ કાર્યક્રમમાં જોડાયા હતા.
સ્નેહમિલનમાંથી કોમી એકતાનો સંદેશ
આ કાર્યક્રમની ખાસ વાત એ રહી કે તેમાં કોઈ એક સમાજ નહીં, પરંતુ તમામ સમાજના લોકો જોડાયા હતા. હિન્દુ અને મુસ્લિમ સમાજના આગેવાનોએ સાથે મળીને નવા વર્ષની શુભેચ્છાઓ પાઠવી હતી.પરિણામે, કાર્યક્રમમાં કોમી એકતા, ભાઈચારો અને સામાજિક સૌહાર્દની ઝલક જોવા મળી હતી. બેઠક નહીં, પરંતુ સ્નેહમિલનના માધ્યમથી થરાદમાં એકતા અને ભાઈચારાનો સંદેશ આપવામાં આવ્યો હતો.
