મોટા મેસરા ગામની સીમમાં LCBની કાર્યવાહી; 1,848 બોટલ દારૂ અને કાર સહિત મુદ્દામાલ કબજે, ચાલક કાર મૂકીને ફરાર
(વાવ-થરાદ)
વાવ-થરાદ જિલ્લા LCB પોલીસે થરાદ-સાંચોર રોડ પર વિદેશી દારૂનો જથ્થો ઝડપી પાડ્યો છે. મોટા મેસરા ગામની સીમમાં નાઈટ પેટ્રોલિંગ દરમિયાન આ કાર્યવાહી કરવામાં આવી હતી. પોલીસે ક્રેટા કારમાંથી ભારતીય બનાવટના વિદેશી દારૂની 1,848 બોટલ કબજે કરી હતી.
પોલીસે દારૂ અને કાર સહિત કુલ રૂ. 11,78,560નો મુદ્દામાલ જપ્ત કર્યો છે. જોકે, પોલીસને જોઈ કારનો ચાલક વાહન મૂકીને ફરાર થઈ ગયો હતો.

નાઈટ પેટ્રોલિંગ દરમિયાન LCBની કાર્યવાહી
પોલીસ વિભાગના જણાવ્યા મુજબ, બનાસકાંઠા રેન્જના પોલીસ મહાનિરીક્ષક ચિરાગ કોરડિયા અને વાવ-થરાદ જિલ્લા પોલીસ અધિક્ષક મૌસમ મેડતાએ દારૂ તથા જુગારની પ્રવૃત્તિઓ સામે કડક કાર્યવાહી કરવા સૂચના આપી હતી.
આ સૂચના હેઠળ LCB પોલીસ ઇન્સ્પેક્ટર એ.પી. ચૌધરીના માર્ગદર્શન હેઠળ પોલીસ સ્ટાફ નાઈટ પેટ્રોલિંગમાં હતો. દરમિયાન થરાદ પોલીસ સ્ટેશન વિસ્તારમાં મોટા મેસરા ગામની સીમમાં થરાદ-સાંચોર રોડ પર ક્રેટા કાર નંબર GJ18BP5272 શંકાસ્પદ હાલતમાં જોવા મળી હતી.
1,848 બોટલ અને કાર સહિત રૂ. 11.78 લાખનો મુદ્દામાલ જપ્ત
પોલીસના જણાવ્યા મુજબ, ક્રેટા કારમાં ભારતીય બનાવટનો વિદેશી દારૂ વગર પાસ-પરમિટે લઈ જવામાં આવતો હતો. પોલીસનો પીછો જોઈ ચાલક કાર મૂકીને ફરાર થઈ ગયો હતો.
ત્યારબાદ પોલીસે કારની તપાસ કરતાં વિદેશી દારૂની કુલ 1,848 બોટલ મળી આવી હતી. આ દારૂની કિંમત રૂ. 4,78,560 આંકવામાં આવી છે. જ્યારે ક્રેટા કારની કિંમત રૂ. 7 લાખ ગણવામાં આવી છે.
આમ, પોલીસે કુલ રૂ. 11,78,560નો મુદ્દામાલ કબજે કર્યો હતો.

ચાલક સામે પ્રોહિબિશન એક્ટ હેઠળ કાર્યવાહી
પોલીસે કારના ચાલક તરીકે મહેન્દ્રભાઈ નાગજીભાઈ રાજપૂત (રહે. ચારડા, તા. થરાદ, જિ. વાવ-થરાદ)નું નામ જાહેર કર્યું છે. આ મામલે થરાદ પોલીસ સ્ટેશનમાં પ્રોહિબિશન એક્ટ હેઠળ કાયદેસરની કાર્યવાહી હાથ ધરવામાં આવી છે.
હાલમાં ફરાર ચાલકને ઝડપી પાડવા અને દારૂનો જથ્થો ક્યાંથી લાવવામાં આવ્યો હતો તે સહિતની વધુ વિગતો મેળવવા તપાસ હાથ ધરવામાં આવી છે.
