થરાદ તાલુકામાંથી પસાર થતાં ભારતમાળા રોડ પર આજે એક મોટી દુર્ઘટના સર્જાતાં ટળી ગઈ. ગુજરાત રાજ્યમાંથી કોલસો ભરી ઉત્તરપ્રદેશ જઈ રહેલ એક ટ્રેલર થરાદ–મીઠા રોડ નજીક પહોંચતા અચાનક આગની ઝપટે આવી ગયું. પ્રાથમિક માહિતી મુજબ ટ્રેલરના વાયરીંગમાં શોર્ટ સર્કિટ થવાને કારણે ટ્રેલરમાં આગ લાગી હોવાનું જાણવા મળ્યું છે.આ ઘટનાની જાણ થતાં જ થરાદ નગરપાલિકાની ફાયર બ્રિગેડને તાત્કાલિક કોલ મળ્યો હતો.
ફાયર બ્રિગેડની ટીમ તરત જ ઘટના સ્થળે પહોંચી અને ભારે જહેમત બાદ આગ પર કાબૂ મેળવવામાં સફળ રહી. આગ ભયાનક સ્વરૂપ ધારણ કરે તે પહેલા જ ફાયર ફાઇટરો દ્વારા સમયસર કામગીરી કરવામાં આવતા ટ્રેલરમાં ભરેલ તમામ કોલસો તેમજ ટ્રેલરનો મોટો ભાગ બચાવી લેવામાં આવ્યો હતો.જો કે આગની ઘટનામાં ટ્રેલરના કેબિન અને એન્જિન ભાગ સંપૂર્ણપણે બળી ને રાખ થઈ ગયા હોવાનું જાણવા મળ્યું છે. સદનસીબે આ આગની ઘટનામાં કોઈપણ પ્રકારની જાનહાનિ કે ઈજાની નોંધ સામે આવી નથી, જે એક મોટી રાહતરૂપ બાબત છે.
ભારતમાળા રોડ પર સતત ભારે વાહનોની અવરજવર રહેતી હોવાથી થોડા સમય માટે ટ્રાફિક વ્યવસ્થા પર અસર પડી હતી, પરંતુ ફાયર બ્રિગેડ અને સ્થાનિક તંત્રની સુમેળભરી કામગીરીના કારણે સ્થિતિ ઝડપથી સામાન્ય બની હતી.સ્થાનિક લોકો અને વાહનચાલકો દ્વારા થરાદ નગરપાલિકા ફાયર બ્રિગેડની ઝડપી કાર્યવાહી અને સતર્કતા બદલ પ્રશંસા કરવામાં આવી રહી છે. આ ઘટનાએ ફરી એકવાર ભારે વાહનોમાં નિયમિત વાહન ચકાસણી અને સલામતી વ્યવસ્થાની આવશ્યકતા ઉપર ભાર મૂક્યો છે.
