નેપાળની રાજનીતિમાં મોટો ફેરફાર સર્જાયો છે. દેશના ભૂતપૂર્વ પ્રધાનમંત્રી કેપી શર્મા ઓલીને આજે સવારે પોલીસ દ્વારા ધરપકડ કરવામાં આવી છે. આ ઘટના એવા સમયે સામે આવી છે જ્યારે નવા પ્રધાનમંત્રી બાલેન્દ્ર શાહએ તાજેતરમાં જ શપથ લીધા છે.
મળતી માહિતી મુજબ, ભક્તપુર જિલ્લા પોલીસ દ્વારા ઓલીને તેમના નિવાસસ્થાનેથી જ અટકાયત કરવામાં આવ્યા હતા. પોલીસ અધિક્ષક સૂર્ય બહાદુર ખડકાએ જણાવ્યું કે ગયા વર્ષ દરમિયાન થયેલા વિરોધ પ્રદર્શનોમાં તેમની સંડોવણી અંગે તપાસ ચાલી રહી હતી, જેના આધારે આ કાર્યવાહી હાથ ધરવામાં આવી છે.
આ કેસમાં ભૂતપૂર્વ ગૃહમંત્રી રમેશ લેખકને પણ ઓલી સાથે જ અટકાયતમાં લેવામાં આવ્યા હોવાનું જાણવા મળે છે. ભ્રષ્ટાચાર વિરોધી આંદોલનો દરમિયાન હિંસક ઘટનાઓને રોકવામાં નિષ્ફળતા બદલ તપાસ સમિતિએ ઓલી સામે કાર્યવાહી કરવાની ભલામણ કરી હતી.
ખાસ નોંધનીય છે કે દેશના સૌથી યુવા પ્રધાનમંત્રી તરીકે બાલેન્દ્ર શાહએ શપથ લીધાના માત્ર એક દિવસ પછી જ આ કાર્યવાહી કરવામાં આવી છે, જેને કારણે નેપાળની રાજકીય પરિસ્થિતિ વધુ તંગ બની શકે છે.
હાલમાં પોલીસ દ્વારા વધુ પૂછપરછ ચાલુ છે અને આગામી દિવસોમાં આ મામલે વધુ ખુલાસા થવાની શક્યતા વ્યક્ત કરવામાં આવી રહી છે.
