આગામી 22 જૂન, 2025ના રોજ બનાસકાંઠા જિલ્લાના વાવ તાલુકાની 50 ગ્રામ પંચાયતોની ચૂંટણી માટે તડામાર તૈયારીઓ શરૂ થઈ ચૂકી છે. કુલ 111 ઉપરાંત બુથો ઉપર યોજાનારી ચૂંટણીને ધ્યાનમાં રાખીને આજે ચૂંટણી તંત્ર દ્વારા મહત્વપૂર્ણ પગલાં ભરવામાં આવ્યા છે.
થરાદ પ્રાંત અધિકારી તુષાર જાની તેમજ વાવ મામલતદાર મિત્તલબેન પટેલ ના અધ્યક્ષ સ્થાને નાયબ મામલતદાર ની હાજરીમાં ચુંટણી પ્રક્રિયામાં ફરજ બજાવનારા 530થી વધુ મતદાન કર્મચારીઓ, જેમાં પ્રિસાઇડિંગ ઓફિસર અને અન્ય સહાયક સ્ટાફનો સમાવેશ થાય છે, તેમને આજે વિશેષ તાલીમ આપવામાં આવી. આ તાલીમમાં મૂળભૂત મતદાન પ્રક્રિયા જેવી કે બેલેટ પેપરનું ઉપયોગ, મતદાન પેટી ખોલવી, મતદાતાને પત્ર આપવો, મતદાન બાદ પેટી સીલ કરવી અને સુરક્ષિત રીતે સ્થળાંતર વિશે સ્પષ્ટ માર્ગદર્શન આપવામાં આવ્યું.
આ વર્ષે ફરી એકવાર બેલેટ પેપર પદ્ધતિથી મતદાન યોજાવાનું છે, જેને કારણે તમામ કર્મચારીઓને પ્રક્રિયા અંગે વિશેષ સમજ આપવામાં આવી. ખાસ કરીને જ્યાં 700થી વધુ મતદાર હોય તેવા બુથો માટે બે પેટી મૂકવાની વ્યવસ્થા અને તે સંલગ્ન તકેદારી અંગે પણ સૂચનાઓ અપાઈ.
પ્રિસાઇડિંગ ઓફિસરો ઉભરી આવતા પ્રશ્નોની પણ સમીક્ષા કરવામાં આવી, જેથી ચુંટણીના દિવસે કોઈ અવ્યવસ્થાની સ્થિતિ ઊભી ન થાય. તમામ કર્મચારીઓએ મતદાન પ્રક્રિયા શાંતિપૂર્ણ અને વ્યવસ્થિત રીતે પાર પાડવા માટે પુર્ણ જાગૃતિ રાખવાની પ્રતિબદ્ધતા વ્યક્ત કરી.
