શાંતાબેન વાઘજીભાઈ ગગલદાસ દોશી પરિવારનું આયોજન; ગ્રામજનોએ પણ સ્વયંસેવક બની સેવાકાર્યમાં સહયોગ આપ્યો
થરાદ તાલુકાના ઝેટા ગામે ભાઈબીજના પર્વે પરંપરાગત લોકમેળો યોજાયો હતો. કારતક સુદ બીજ, બુધવાર તા. 11 નવેમ્બર 2026ના રોજ નકળંગ ભગવાનના મંદિરે આ મેળો ભરાયો હતો.
વર્ષોથી યોજાતા આ લોકમેળામાં આસપાસનાં ગામોમાંથી મોટી સંખ્યામાં ભાવિકો ઉમટ્યા હતા. ભક્તોએ નકળંગ દાદાનાં દર્શન કરી ધન્યતા અનુભવી હતી.
દોશી પરિવાર દ્વારા ભોજન પ્રસાદની સેવા
આ લોકમેળામાં ભોજન પ્રસાદની સેવા ખાસ આકર્ષણ બની હતી. ઝેટા ગામના શાંતાબેન વાઘજીભાઈ ગગલદાસ દોશી પરિવાર દ્વારા આ સેવા યોજાઈ હતી.
પરિવારે નકળંગ દાદાના દર્શને આવતા ભાવિકો માટે નિઃશુલ્ક ભોજન પ્રસાદની વ્યવસ્થા કરી હતી. દૂરદૂરથી આવેલા ભક્તોને પ્રેમ અને સેવાભાવથી ભોજન પીરસવામાં આવ્યું હતું. મોટી સંખ્યામાં ભાવિકોએ પ્રસાદનો લાભ લીધો હતો.
ગ્રામજનો પણ સેવાકાર્યમાં જોડાયા
આ સેવાકાર્યમાં ઝેટા ગામના ગ્રામજનોએ પણ ઉત્સાહભેર સહયોગ આપ્યો હતો. ગ્રામજનોએ સ્વયંસેવક તરીકે જોડાઈને ભોજન પ્રસાદના આયોજનમાં સેવા આપી હતી.
આમ, ધાર્મિક આસ્થાની સાથે માનવસેવાનો સુંદર સમન્વય જોવા મળ્યો હતો. ભોજન પ્રસાદની વ્યવસ્થાથી મેળામાં આવેલા ભાવિકોમાં આનંદ જોવા મળ્યો હતો.
સહયોગીઓનો દોશી પરિવાર દ્વારા આભાર
આ સેવાકાર્યમાં સહયોગ આપનાર તમામ ગ્રામજનો અને સેવાભાવી કાર્યકરોનો ધુડાલાલ દોશી, હિતેશભાઈ દોશી અને નિલેશભાઈ દોશીએ હૃદયપૂર્વક આભાર માન્યો હતો.
તેમણે આ ભોજન પ્રસાદની સેવાને નકળંગ દાદાના આશીર્વાદ સમાન ગણાવી હતી. ભાઈબીજના પવિત્ર પર્વે દોશી પરિવારની આ સેવાએ શ્રદ્ધા અને સેવાભાવનો સંદેશ આપ્યો હતો.
