અકસ્માતોની ઘટનાઓને પગલે સુરક્ષિત ટ્રાફિક વ્યવસ્થાની માંગ; થરાદની ઐતિહાસિક ઓળખ જળવાય તે માટે થિરપાલ ધરુંની પ્રતિમા સ્થાપિત કરવાની માગણી
(વાવ-થરાદ)
થરાદ શહેરના ત્રણ રસ્તા વિસ્તારમાં વધતા વાહનવ્યવહાર અને ટ્રાફિકની સમસ્યાને ધ્યાનમાં રાખીને અહીં થિરપુરના સ્થાપક થિરપાલ ધરુંની પ્રતિમા સાથે સુંદર સર્કલ બનાવવાની લોકમાંગ ઊઠી છે. સ્થાનિક નાગરિકો અને વેપારીઓનું કહેવું છે કે આ સ્થળે યોગ્ય આયોજન સાથે સર્કલ બનાવવામાં આવે તો ટ્રાફિક વ્યવસ્થામાં સુધારો થવાની સાથે થરાદના ઐતિહાસિક વારસાને પણ નવી ઓળખ મળી શકે છે.
શહેરના ત્રણ રસ્તા વિસ્તારમાં દિવસ દરમિયાન નાના-મોટા વાહનોની અવરજવર રહે છે. મુખ્ય માર્ગો જોડાતા આ જંકશન પર વાહનોની વધતી સંખ્યાને કારણે અવ્યવસ્થિત ટ્રાફિકની સ્થિતિ સર્જાતી હોવાની ફરિયાદો છે. સ્થાનિકોના જણાવ્યા મુજબ, આ વિસ્તારમાં અગાઉ અનેક અકસ્માતો થયા છે, જેમાં બાળકો અને યુવાનો સહિત અનેક લોકોએ જીવ ગુમાવ્યા છે. આવી દુર્ઘટનાઓનું પુનરાવર્તન અટકાવવા માટે અહીં કાયમી અને સુરક્ષિત ટ્રાફિક વ્યવસ્થા ઊભી કરવાની જરૂરિયાત વ્યક્ત કરવામાં આવી છે.
થિરપાલ ધરુંની પ્રતિમા સ્થાપિત થાય તો ઐતિહાસિક ઓળખ વધે
થરાદના ઇતિહાસ સાથે જોડાયેલા થિરપુરના સ્થાપક થિરપાલ ધરુંની યાદમાં ત્રણ રસ્તા પાસે સર્કલ બનાવવાની માંગ કરવામાં આવી છે. સ્થાનિકોના મતે, સર્કલની મધ્યમાં થિરપાલ ધરુંની પ્રતિમા સ્થાપિત કરવામાં આવે તો શહેરની ઐતિહાસિક ઓળખને યોગ્ય સ્થાન મળી શકે છે.
આ ઉપરાંત બહારથી આવતા લોકો માટે પણ આ સ્થળ શહેરની આગવી ઓળખ બની શકે અને નવી પેઢીને પોતાના વિસ્તારના ઇતિહાસથી પરિચિત થવાની તક મળે તેવી લાગણી નાગરિકોએ વ્યક્ત કરી છે.
ટ્રાફિક સુરક્ષા સાથે સર્કલના આયોજનની માંગ
સ્થાનિક નાગરિકો અને વેપારીઓએ સંબંધિત તંત્ર સમક્ષ માંગ કરી છે કે ત્રણ રસ્તા વિસ્તારની સ્થળ મુલાકાત લઈ ટ્રાફિકની સ્થિતિનો અભ્યાસ કરવામાં આવે. રસ્તાની પહોળાઈ, વાહનોની અવરજવર, રાહદારીઓની સુરક્ષા અને જરૂરી તકનીકી બાબતોને ધ્યાનમાં રાખીને સર્કલ બનાવવાની શક્યતા તપાસવામાં આવે.
થરાદના ત્રણ રસ્તા વિસ્તારમાં ટ્રાફિકની સમસ્યાનો કાયમી ઉકેલ આવે અને શહેરના ઐતિહાસિક વારસાનું જતન પણ થાય તે દિશામાં તંત્ર દ્વારા આયોજન કરવામાં આવે તેવી લોકલાગણી જોવા મળી રહી છે. હવે સંબંધિત વિભાગો આ લોકમાંગને ધ્યાનમાં રાખીને કેવો નિર્ણય લે છે તે જોવાનું રહેશે.
