કોરોના મહામારી વચ્ચે ઈંગ્લેન્ડ-વિન્ડીઝ ટેસ્ટ શ્રેણી સાથે આંતરરાષ્ટ્રીય ક્રિકેટની વાપસી થઈ હતી. ત્રણ મેચની ટેસ્ટ શ્રેણીનો પ્રથમ મુકાબલો સાઉથમ્પટનમાં રમાયો હતો. એ મેચ વિન્ડીઝે જીતી હતી. એવું માનવામાં આવી રહ્યું હતું પરંતુ શ્રેણીની અંતિમ બંને ટેસ્ટ મેચમાં ઈંગ્લેન્ડે બાજી મારી લીધી. શ્રેણીની અંતિમ અને નિર્ણાયક ટેસ્ટમાં ઈંગ્લેન્ડે એકતરફી જીત હાંસલ કરી. આ જીત બાદ આઇસીસી વર્લ્ડ ટેસ્ટ ચેમ્પિયનશિપના પોઇન્ટ ટેબલમાં ફેરફાર થયા છે.
આઇસીસી વર્લ્ડ ટેસ્ટ ચેમ્પિયનશિપના વર્તમાન પોઇન્ટ ટેબલની વાત કરવામાં આવે તો તેમાં ભારતીય ટીમ 360 પોઇન્ટ સાથે ટોચના સ્થાને છે. ઓસ્ટ્રેલિયા 296 પોઇન્ટ સાથે બીજા અને હવે ઈંગ્લેન્ડ 226 પોઇન્ટ સાથે ત્રીજા સ્થાન પહોંચી ગયું છે. ન્યૂઝીલેન્ડ 180 પોઇન્ટ સાથે ચોથા સ્થાને રહ્યું છે. 140 પોઇન્ટ સાથે પાકિસ્તાન પાંચમા સ્થાને અને 80 પોઇન્ટ સાથે શ્રીલંકા છઠ્ઠા સ્થાન પર છે, જ્યારે વિન્ડીઝના ફક્ત 40 પોઇન્ટ છે અને તે સાતમા સ્થાને છે. આઠમા સ્થાને રહેલા દક્ષિણ આફ્રિકાના ૨૪ પોઇન્ટ છે અને છેલ્લા સ્થાને રહેલા બાંગ્લાદેશે હજુ સુધી વર્લ્ડ ટેસ્ટ ચેમ્પિયનશિપના પોઇન્ટ ટેબલમાં ખાતું ખોલ્યું નથી.
