VIDEO / કાર્લોસ બ્રેથવેટ ભૂલ્યો ભાન, બેટ્સમેનને જોરદાર રીતે ફટકાર્યો બોલ: અંપાયરે સંભળાવી એવી સજા કે ફરી ક્યારેય નહીં કરે આવી ભૂલ

વેસ્ટ ઈન્ડિઝના કાર્લોસ બ્રેથવેટે લાઈવ મેચ દરમિયાન એવી હરકત કરી કે જેની ખૂબ ચર્ચા થઈ રહી છે. હકીકતમાં ટી20 બ્લાસ્ટ 2022 ટૂર્નામેન્ટમાં રમતી વખતે બ્રેથવેટે બેટ્સમેનને બોલ માર્યો. જેનો વીડિયો હાલ સોશિયલ મીડિયા પર વાયરલ થઈ રહ્યો છે. ઉલ્લેખનીય છે કે આ ઘટના બાદ અમ્પાયર ગુસ્સે ભરાયા અને સાથે જ બ્રેથવેટની ટીમને 5 રનની પેનલ્ટી ફટકારી. જ્યારે અમ્પાયરે આ સજા સંભળાવી ત્યારે બ્રેથવેટ ચોંકી ગયો અને તેણે કરેલા એક્શન વિશે વાત કરવા લાગ્યો અને એ પણ કહ્યું કે તેણે જાણી જોઈને આવું નથી કર્યું, પરંતુ અમ્પાયરે તેની વાત સાંભળી નહીં. કાર્લોસ બ્રેથવેટનું આ ખાસ કામ જોઈને ફેન્સ પણ આશ્ચર્યચકિત થઈ ગયા છે અને તેના પર પ્રતિક્રિયા આપી રહ્યા છે.હકીકતમાં એવું બન્યું કે બેટ્સમેને કાર્લોસ બ્રેથવેટના બોલ પર સીધો શોટ માર્યો જે સીધો બોલર પાસે ગયો, જ્યારે બ્રેથવેટને લાગ્યું કે શોટ રમ્યા પછી પણ બેટ્સમેન તેની ક્રિઝની બહાર છે. આવી સ્થિતિમાં બ્રેથવેટે વિચાર્યા વિના બોલ બેટ્સમેન તરફ ફેક્યો. જેના કારણે બોલ બેટ્સમેનના પગમાં વાગ્યો હતો. ત્યારપછી બેટ્સમેને અમ્પાયર તરફ ઈશારો કર્યો અને બ્રેથવેટની આ એક્શન અંગે ફરિયાદ કરી. આવી સ્થિતિમાં બંને મેદાન પરના અમ્પાયરોએ એકબીજા સાથે વાત કરી અને પછી બ્રેથવેટની ટીમને 5 રનની પેનલ્ટી ફટકારી.ઉલ્લેખનીય છે કે બ્રેથવેટ ટી20 બ્લાસ્ટમાં બર્મિંગહામ બેયર્સ ટીમનો કેપ્ટન છે. હકીકતમાં આ ઘટના રવિવારે ડર્બીશાયર સામેની મેચ દરમિયાન બની હતી. ડર્બીશાયરની ઈનિંગની 13મી ઓવરમાં બેટ્સમેન વેન મેડસેન સાથે આ ઘટના બની હતી. કેરેબિયન ઓલરાઉન્ડરે બાદમાં માફી પણ માંગી હતી.મેચની વાત કરીએ તો બ્રેથવેટ ચાર ઓવરમાં 29 રન આપીને 1 વિકેટ લેવામાં સફળ રહ્યો હતો, જ્યારે બર્મિંગહામ બિઅર્સને આ મેચમાં 7 વિકેટથી હારનો સામનો કરવો પડ્યો હતો.