લાઇબ્રેરીનો લાભ લઈ 50થી વધુ વિદ્યાર્થીઓ થયા ગ્રેજ્યુએટ, સરકારી નોકરીને લગતાં પુસ્તકો પણ ઉપલબ્ધ, રહીશોએ પુસ્તકોની સાથે ઘરનું જૂનું ફર્નિચર પણ દાન કર્યુંજે લોકો ઊંચું શિક્ષણ મેળવીને કંઈક બનવાના સપના જોઇ રહ્યા છે તેમના માટે અમદાવાદના દાણીલીમડામાં શાહીન ફાઉન્ડેશન નામની સંસ્થાએ એક લાઈબ્રેરીની શરૂઆત કરી છે. આ લાઈબ્રેરી બનાવવા માટે એકપણ રૂપિયાનો ખર્ચ કરવામાં આવ્યો નથી. જૂનાં પસ્તી-ભંગારના સામાનમાંથી એની શરૂઆત કરાઈ છે. આજે આ લાઈબ્રેરીમાં 2 હજારથી વધુ પુસ્તકો છે અને 10 કમ્પ્યુટર છે. કોઇપણ વિદ્યાર્થી પોતાની જરૂરિયાત મુજબ પુસ્તકો વાંચવા માટે લઇ જઇ શકે છે અને ઓનલાઇન શિક્ષણ પણ મેળવી શકે છે.
શૈક્ષણિક અને સ્પર્ધાત્મક પરીક્ષાનાં પુસ્તકો
દાણીલીમડામાં છેલ્લાં 2 વર્ષથી આ લાઈબ્રેરી ચાલી રહી છે. શરૂઆતમાં એનજીઓએ વિદ્યાર્થીઓના શૈક્ષણિક કાર્ય માટે અલગ-અલગ લોકો પાસેથી જૂનાં પુસ્તકો અને ફર્નિચર માગ્યાં હતાં. લોકોએ પણ પોતાની ઈચ્છા અનુસાર દાન કરતાં શરૂઆતના સમયમાં જ 2 હજારથી વધુ પુસ્તકો મળી ગયાં હતાં, જેનો લાભ આજે અનેક ગરીબ તેમજ મધ્યમ વર્ગના લોકો ઉઠાવી રહ્યા છે. લાઈબ્રેરીમાં આર્કિટેક્ચર, ટાટ, સાયન્સ, નીટ, એલએલબી, કોમર્સ સહિત લગભગ તમામ પ્રકારની શૈક્ષણિક અને સ્પર્ધાત્મક પરીક્ષાની તૈયારી માટેનાં પુસ્તકો મળી રહે છે.
લાઈબ્રેરીમાંથી ભણી અનેક બાળકો ગ્રેજ્યુએટ થયા: ટ્રસ્ટી
લાઈબ્રેરીમાંથી કોઇપણ વિદ્યાર્થી કોઇપણ બુક્સ ફ્રીમાં વાંચી અથવા ઘરે પણ લઈ જઈ શકે છે. અમારા ત્યાં સાયન્સ, એન્જિનિયરિંગ, મેડિકલ, નીટ, એલએલબી સહિતની બુક્સ મળી રહે છે. અમારે ત્યાંથી બુક્સ વાંચી 50થી વધુ વિદ્યાર્થીઓ ગ્રેજ્યુએટ થયા તેમજ સરકારી પરીક્ષાની પણ પુસ્તકો દ્વારા બે દીકરી પોલીસની તૈયારી કરી રહી હતી, જે હાલ કોન્સ્ટેબલ તરીકે નોકરી કરે છે, સાથે જ હાલમાં ઘણા લેખકો તેમજ અન્ય લોકો પોતાની બુક્સ અથવા અન્ય શૈક્ષણિક પુસ્તકોનું દાન કરી બાળકોના મદદરૂપ બની રહ્યા છે. હજુ પણ લોકો મને ફોન કરીને પોતે પણ પોતાનાં જૂના પુસ્તકો લાઈબ્રેરીને આપવા ઈચ્છે છે. આ લાઈબ્રેરી થકી ઘણા વિદ્યાર્થીઓ અને ખાસ કરીને યુવતીઓને ખૂબ જ લાભ થયો છે. હાલમાં કોરોના મહામારીને પગલે અમે વધારે વિદ્યાર્થીઓને ભેગા થવા નથી દેતા, પરંતુ તેમને જોઈતી બુક્સ ઘરે લઈ જવા આપીએ છીએ.
વિદ્યાર્થીઓ માટે ઊભી કરી કમ્પ્યુટર-ઈન્ટરનેટ સેવા
પુસ્તકોની સાથે શાહીન ફાઉન્ડેશન દ્વારા વિદ્યાર્થીઓને કમ્પ્યુટર તેમજ ફ્રી ઈન્ટરનેટની પણ સુવિધા આપવામાં આવી રહી છે. આ કમ્પ્યુટર પણ સંસ્થાને દાનમાં મળ્યાં છે. લોકો કમ્પ્યુટરના જૂના અલગ-અલગ પાર્ટ આપી જાય છે, જેને જોડીને 10 કોમ્પ્યુટર તૈયાર કરવામાં આવ્યાં છે. આ કમ્પ્યુટર લેબમાં વિદ્યાર્થીઓ ઓનલાઈન પુસ્તકો તેમજ અન્ય જાણકારી પ્રાપ્ત કરે છે. હાલમાં ચાલી રહેલા ઓનલાઈન એજ્યુકેશનમાં ગરીબ-મધ્યમ વર્ગના વિદ્યાર્થીઓને આ કમ્પ્યુટરનો ઘણો ફાયદો પહોંચ્યો છે
