ઉત્તર ગુજરાતમાં ગઈ કાલે જે રીતે સાબરકાંઠાની અંદર વરસાદના કારણે પાણી જ પાણી જોવા મળ્યું હતું તેજ રીતે આજે બનાસકાંઠામાં વરસાદના કારણે રોડ તૂટવાની, ડેમો નદીઓમાં પાણીના નવા નીરની આવક થઈ રહી છે તો કેટલાક નીચાણવાળા વિસ્તારમાં ઘૂંટણ સમા પાણી છે. આ ઉપરાંત કેટલાક રસ્તાઓ બંધ થયા છે. દાંતીવાડાથી પાંથાવાડા જતા હાઇવે ઉપર પાણી ફરી વળ્યા છે. ભારે વરસાદને લઈને હાઇવે ઉપર નદીઓના પાણી આવી રહ્યા છે. દાંતીવાડાથી પાંથાવાડાના 30 ગામોને જોડતા રસ્તા ઉપર પાણી જ પાણી જોવા મળી રહ્યું છે. ઘૂંટણસમા પાણી ભરાતા વાહન ચાલકો પરેશાન બન્યા છે.
બનાસકાંઠામાં આ રસ્તા પર હંગામી ધોરણે રસ્તા બંધ.
બનાસકાંઠા જિલ્લામાં અતિભારે વરસાદને પગલે ડીસા તાલુકાના રસ્તાઓ ઓવેરટોપિંગના લીધે હંગામી ધોરણે વાહન વ્યવહાર માટે બંધ કરવામાં આવ્યા છે. આ ઉપરાંત ભીલડી – બલોધર રોડ, ભીલડી – નેસડા – પેપળુ રોડ, નેશનલ હાઇવેથી ઘટનાળ રોડ, સ્ટેટ હાઇવેથી ઘટનાળ રોડ, નવી ભીલડીથી જુના નેસડાથી ઘટનાળ મોટી રોડ, પાલડી – વડલાપુર રોડ, કંસારી – શેસુરા રોડ, ગુગળ એપ્રોચ રોડ, પેપરાળ – ગણતા રોડ, લાખણી, ગોઢથી છત્રાલા રોડ.
કાંકરેજ પંથકમાં 24 કલાકમાં ચાર ઇંચથી વધુ વરસાદ
બનાસકાંઠામાં કાંકરેજમાં પંથકમાં બીજા દિવસે પણ મેઘમહેર યથાવત છે. ફરી વહેલી સવારથી કાંકરેજના શિહોરી, ખીમાણા ખારીયા સહિતના ગ્રામ્ય વિસ્તારોમાં વરસાદ જોવા મળ્યો હતો. કાંકરેજ પંથકમાં 24 કલાકમાં ચાર ઇંચથી વધુ વરસાદ ખાબકયો છે. ઠેર ઠેર વરસાદી પાણી ભરાતા સ્થાનિકોને હાલાકી પડી રહી છે. જિલ્લામાં સાર્વત્રિક વરસાદ થતા ખેડૂતોમાં બીજી બાજુ ખુશહાલીનો પણ માહોલ છે.
દાંતીવાડાથી પાથાવાડા જતો હાઈવે તૂટ્યો
જિલ્લામાં ભારે વરસાદથી નદી નાળા છલકાયા છે. દાંતીવાડા નજીક આવેલ વૉહળામાં ઘોડાપુર જેવી સ્થિતિ છે. ભરપૂર માત્રામાં વૉહલાઓ પાણીની આવક થઈ રહી છે. ઉપરવાસમાં ભારે વરસાદથી વૉહલામાં વેણ વધ્યું છે. દાંતીવાડામાં ભારે વરસાદથી રોડ રસ્તા પાણીમાં ગરકાવ થઈ રહ્યા છે. બનાસ નદીના પુલ નજીક આવેલ હાઇવેમાં ધોવાણ પણ થઈ રહ્યું છે. દાંતીવાડાથી પાથાવાડા જતો હાઈવે તૂટ્યો હતો. હાઇવે ધોવાતા વાહન ચાલકોને હાલાકી પડી રહી છે
