ખેતરના પાળે ઝાડીમાંથી ખોપરી, પગના ભાગ સહિત હાડકાં મળ્યાં; માવસરી પોલીસ, FSL અને આરોગ્ય વિભાગની ટીમે તપાસ હાથ ધરી
વાવ-થરાદ
વાવ-થરાદ જિલ્લાના કુંડાળીયા ગામની સીમમાંથી માનવ અવશેષો મળી આવતાં પંથકમાં ચકચાર મચી છે. ખેતરના પાળે આવેલી બોરડીની ઝાડીમાંથી ખોપરીનો ભાગ, પગના હાડકાં અને અન્ય અવશેષો મળી આવ્યા હતા. ઘટનાની જાણ થતાં માવસરી પોલીસ, FSL અને આરોગ્ય વિભાગની ટીમે સ્થળ પર પહોંચી તપાસ હાથ ધરી હતી.
મળતી માહિતી મુજબ, સરહદી રાધાનેસડા ગામનો સુખદેવ કોળી નામનો યુવક ગત 5 તારીખથી ગુમ હતો. આ અંગે તેના પરિવારજનોએ માવસરી પોલીસ મથકે જાણવાજોગ ફરિયાદ નોંધાવી હતી. દરમિયાન, ગુમ થયાના આશરે 15 દિવસ બાદ કુંડાળીયા ગામની સીમમાં અવશેષો મળી આવ્યા હતા.

સ્થળ પરથી ઓળખના દસ્તાવેજો પણ મળ્યા
કુંડાળીયા ગામની સીમમાં ખેતરના પાળે આવેલી બોરડીની ઝાડીમાંથી અલગ-અલગ જગ્યાએ હાડકાંના અવશેષો મળી આવ્યા હતા. તેમાં ખોપરીનો ભાગ, કમરથી નીચેના પગના હાડકાં અને અન્ય હાડકાંના ટુકડાઓનો સમાવેશ થાય છે.
આ ઉપરાંત, સ્થળ પરથી આધારકાર્ડ, ચૂંટણી કાર્ડ, પાનકાર્ડ અને એટીએમ કાર્ડ સહિતના દસ્તાવેજો પણ મળી આવ્યા હતા. આ દસ્તાવેજોને આધારે પરિવારજનોએ મળેલા અવશેષો ગુમ થયેલા સુખદેવ કોળીના હોવાની આશંકા વ્યક્ત કરી છે.

FSL રિપોર્ટ બાદ જ ઓળખ સ્પષ્ટ થશે
જોકે, મળેલા માનવ અવશેષો સુખદેવ કોળીના જ છે કે અન્ય કોઈના, તે અંગે હજુ સત્તાવાર પુષ્ટિ થઈ નથી. આ માટે FSL દ્વારા તપાસ હાથ ધરવામાં આવી છે. પ્રાથમિક તપાસ અને રિપોર્ટ બાદ વધુ વિગતો સામે આવી શકે છે.
હાલ માવસરી પોલીસે સ્થળ તપાસ સહિતની જરૂરી કાર્યવાહી કરી છે. અવશેષો અને અન્ય પુરાવા FSLને તપાસ માટે સોંપવામાં આવ્યા છે. પોલીસે આ મામલે એ.ડી. નોંધ કરી વધુ તપાસ શરૂ કરી હોવાનું જાણવા મળ્યું છે.
હવે FSLના રિપોર્ટની રાહ જોવાઈ રહી છે. રિપોર્ટ આવ્યા બાદ જ માનવ અવશેષોની ઓળખ અને સમગ્ર ઘટનાની હકીકત સ્પષ્ટ થઈ શકશે.
