: બનાસકાંઠા જિલ્લામાં સ્ટેટ મોનિટરિંગ સેલ દ્વારા એક મોટી અને સફળ કાર્યવાહી કરવામાં આવી છે. થરા પોલીસ સ્ટેશન વિસ્તારના ઉણ ગામ નજીક હાઈવે પરથી પસાર થતા એક ટ્રકમાંથી SMC ની ટીમે 1.20 કરોડ રૂપિયાની કિંમતનો 900 પેટી વિદેશી દારૂ ઝડપી પાડ્યો છે. પોલીસે સ્થળ પરથી 2 આરોપીઓની ધરપકડ કરીને કાયદેસરની કાર્યવાહી હાથ ધરી છે.
બાતમીના આધારે SMC નું સફળ ઓપરેશન
ગાંધીનગર સ્ટેટ મોનિટરિંગ સેલના પીઆઈ પી.બી. જેબલ્યાની આગેવાની હેઠળની ટીમને બાતમી મળી હતી કે હાઈવે પરથી એક ટ્રકમાં મોટા પાયે વિદેશી દારૂની હેરાફેરી થઈ રહી છે. આ ચોક્કસ બાતમીના આધારે ટીમે થરા નજીક ઉણ ગામ પાસેના હાઈવે પર વોચ ગોઠવી હતી. તે દરમિયાન શંકાસ્પદ જણાતા એક ટ્રકને અટકાવીને તેની સઘન તલાશી લેવામાં આવી હતી.
કપડાંના બોરાની આડમાં થતી હતી હેરાફેરી
પોલીસની તપાસમાં જાણવા મળ્યું હતું કે, બુટલેગરોએ પોલીસથી બચવા માટે નવો કીમિયો અપનાવ્યો હતો. ટ્રક (નંબર RJ-18-GA-6642) માં તપાસ કરતા અંદરથી કપડાંના બોરા મળી આવ્યા હતા. પરંતુ પોલીસે વધુ ઊંડાણપૂર્વક તપાસ કરતા આ કપડાંના બોરાની આડમાં સંતાડવામાં આવેલો વિદેશી દારૂનો મોટો જથ્થો મળી આવ્યો હતો.
900 પેટી દારૂ સહિત 1.20 કરોડનો મુદ્દામાલ જપ્ત
SMC ની ટીમે પાડેલા આ દરોડામાં ટ્રકમાંથી કુલ 900 પેટી વિદેશી દારૂ કબજે કરવામાં આવ્યો છે. ઝડપાયેલા આ વિદેશી દારૂના જથ્થા અને ટ્રક સહિતના મુદ્દામાલની કુલ કિંમત આશરે 1.20 કરોડ રૂપિયા આંકવામાં આવી છે. પોલીસે ઘટનાસ્થળેથી જ ટ્રકમાં સવાર 2 આરોપીઓની અટકાયત કરી લીધી હતી.
પંજાબથી કચ્છ જતો હોવાનો ખુલાસો, વધુ તપાસ શરૂ
પકડાયેલા આરોપીઓની પ્રાથમિક પૂછપરછમાં એવો ખુલાસો થયો છે કે, દારૂ ભરેલો આ ટ્રક પંજાબથી નીકળ્યો હતો અને તેને કચ્છ તરફ લઈ જવામાં આવી રહ્યો હતો. હાલમાં SMC ની ટીમ દ્વારા બંને આરોપીઓની સત્તાવાર ધરપકડ કરી આગળની કાર્યવાહી હાથ ધરવામાં આવી છે. આ ટ્રક કોની માલિકીનો છે, પંજાબથી કોણે માલ ભરાવ્યો હતો અને કચ્છમાં આ જંગી જથ્થો કોને ડિલિવર કરવાનો હતો, તે તમામ દિશામાં પોલીસે તપાસના ચક્રો ગતિમાન કર્યા છે. આગામી દિવસોમાં આ નેટવર્ક સાથે જોડાયેલા અન્ય આરોપીઓના નામ પણ ખૂલવાની સંભાવના છે.
