લાયન્સ ક્લબ ઓફ થરાદ સિટી દ્વારા સામાજિક સેવા પ્રવૃત્તિ હેઠળ જનતા હાઈસ્કૂલ, થરાદ ખાતે મફત આંખ તપાસ કેમ્પનું આયોજન કરવામાં આવ્યું હતું. આ કેમ્પ લાયન મેમ્બર અને અનંતા હોસ્પિટલના આંખના સર્જન ડૉ. અશોકભાઈ ચૌધરીના સહયોગથી યોજાયો હતો, જેમાં આશરે 600 જેટલા વિદ્યાર્થી-વિદ્યાર્થીનીઓની આંખોની તપાસ કરવામાં આવી.
કેમ્પ દરમિયાન નિષ્ણાત તબીબી ટીમે વિદ્યાર્થીઓની દ્રષ્ટિ તપાસી જરૂરી માર્ગદર્શન આપ્યું હતું. સમયસર તપાસ થવાથી આંખ સંબંધિત સમસ્યાઓનું વહેલું નિદાન થઈ શકે અને યોગ્ય સારવાર મળી રહે તે હેતુથી આ આયોજન કરવામાં આવ્યું હતું.
આ પ્રસંગે લાયન્સ ક્લબના પ્રમુખ કિર્તીભાઈ આચાર્ય, રીજન ચેરમેન ડૉ. પ્રવિણસિંહ ચૌહાણ, મંત્રી દશરથભાઈ સોની, ડિસ્ટ્રિક્ટ ઓફિસર્સ ડૉ. રિતેશ પ્રજાપતિ અને વશરામભાઈ પટેલ ઉપસ્થિત રહ્યા હતા અને સેવાકીય કાર્યની પ્રશંસા કરી હતી.
શાળાના આચાર્ય મનુભાઈ ડામોર તથા સ્ટાફ સભ્યોએ આયોજનમાં મહત્વપૂર્ણ સહયોગ આપ્યો હતો. આયોજકોએ જણાવ્યું હતું કે વિદ્યાર્થીઓના આરોગ્યને ધ્યાનમાં રાખી આવી સેવાકીય પ્રવૃત્તિઓ ભવિષ્યમાં પણ ચાલુ રાખવામાં આવશે.
