પશુઓમાં આવેલ લમ્પી વાઇરસને ફેલાતો અટકાવવા બનાસકાંઠા જિલ્લા વહીવટીતંત્ર સતર્કઃ જિલ્લામાં ૪૨ ટીમો ૮૪ પશુધન નિરીક્ષકો સાથે ખડેપગે જિલ્લામાં ૯ તાલુકાઓ લમ્પી વાઇરસ અસરગ્રસ્તઃ જે ગામમાં એકપણ કેસ ન નોંધાયો હોય તેવા તંદુરસ્ત પશુઓને રસી અપાવવા પશુપાલન વિભાગની અપીલ લમ્પી વાઇરસથી અસરગ્રસ્ત પશુઓને સત્વરે સારવાર અપાવવી, બીજા પશુથી અલગ રાખવા અને ચરવા ન છોડવા તંત્રની તાકીદ તાત્કાલિક સારવાર માટે ટોલ ફ્રી નંબર ૧૯૬૨ ઉપર સંપર્ક કરોઃ ૫ એનીમલ એમ્બ્યુલન્સ રાઉન્ડ ધ ક્લોક સેવામાં પશુઓમાં આવેલ લમ્પી વાઇરસથી પશુપાલકોમાં ભયનો માહોલ વ્યાપો છે પરંતુ આ વાઇરસથી બિલકુલ ડરવાની કે ગભરાવવાની જરૂર નથી. બનાસકાંઠા જિલ્લામાં હાલ ૯ તાલુકાઓમાં આ વાઇરસની અસર પશુઓમાં જોવા મળી રહી છે ત્યારે આ વાઇરસને ફેલાતો અટકાવવા બનાસકાંઠા જિલ્લા વહીવટી તંત્ર દ્વારા સમયસર કામગીરી હાથ ધરીને વ્યાપક પગલાંઓ લેવામાં આવી રહ્યાં છે. લમ્પી વાયરસની સારવાર, સર્વે અને અવેરનેસ માટે જિલ્લામાં ૪૨ ટીમોમાં ૮૪ પશુધન નિરીક્ષકો અને વેટર્નરી તબીબો ખડેપગે સેવા આપી રહ્યાં છે. આ વાઇરસના જિલ્લામાં હાલ સરેરાશ રોજના ૨૧૫ જેટલાં નવા કેસો નોંધાઇ રહ્યાં છે. ૧૫ ટકા જેટલો રિકવરી રેટ છે અને મૃત્યુનું પ્રમાણ માત્ર ૧ થી ૨ ટકા છે.